SABINO OMANO
Ohai:David Galeano Olivera
Leer original (hacer clic) en (http://lenguaguarani.blogspot.com/2017/04/sabino-omano.html)
Leer también en (https://dgaleanolivera.wordpress.com/2017/04/26/sabino-omano/)
I
Mba'e vaiete
Ojehujeýma
Ñane retâmíme.
Kuarahy resême,
Parana ykére,
Táva guasuetépe...
Sabino omano.
Mondaha aña
Chupe ojuka
Mba'evérôguáicha,
Ha ñambyasyvéva
Chugui hesarái
Ijerére oîva
Ha poguasukuéra.
Tuichave mba'e
Viru ñemonda
Opavavetépe.
Ajépa ivai
Péicha ñamboykérô
Tapicha mano.
II
Ko mitârusu
Ka'aguasugua
Tyre'ŷoheja
Ipehênguemi
Mokôi mitâmi
Ha hembireko.
Upéicha avei
Isy ha itúva
Hese'ŷopytáma.
Avave guasu
Ndohechakuaái
Sabino Benítez
Jejapi vai
Ha ome'êhague
Upe hekove
Ohayhu añetégui
Tahachi reko.
III
Upe ára oho
Jepiverôguáicha
Imba'apohápe,
Óga guasuete
Viru hetaite
Oñemo'âhápe.
Upéinte oja
Aña ra'ykuéra
Mbokaita ipópe
Chupe ojapi
Ha ojukaite.
Hi'ari ohasa
Ku aratirícha
Ha ombokapu
Ko'ápe ha pépe.
Osununumba,
Hendy ha ogue
Mbokaita ondyvu
Hyakuâ te'ô...
Tahachi ojukáma.
IV
Jepémo avave
Ndohechakuaái
Reme'êhague
Nde rekovemi
Tahachi rekópe.
Péina ahenduka
Che remimbyasy
Ndéve aropojái
Ha'ekuévo ndéve,
Korasô rasýre,
Aguyje, Sabino.
Upéicha avei
Añepomoî
Tupâ, Ñande Rúpe,
Chupe ajerure
Mborayhu potîme
Taneañuâ
Ha tombojevy
Py'aguapymi
Ko ñane retâme
Anive haĝua
Ipype ojehu
Âichagua mba'e
ooo000ooo
Escuchar SABINO BENÍTEZ OMANO, en (https://mx.ivoox.com/es/sabino-benitez-omano-audios-mp3_rf_18345579_1.html)