KA'AGUY OJEJUKÁVO, ÑAMANO ÑANDE
Ohai: David Galeano Olivera
Leer original (hacer clic) en (http://cafehistoria.ning.com/profiles/blogs/ka-aguy-ojejuk-vo-amano-ande)
Asimismo leer en (https://dgaleanolivera.wordpress.com/kaaguy-ojejukavo-namano-nande/)
I
Kuimba'e ñaña
Tekove marâ
pyhare ha ára
-Imba'epotágui-
Oity ha ojuka
Ka'aguy porâ.
Oikytî yvyra
Ka'aguy ojuka
Yvy omoperô
Viru ky'apa
Viru raĝuyno,
Viru tujupa,
Ombyaty haĝua.
Ha'e noñandúi
Ndoúi ha ndohói
Mba'e vaiete
Ipo rupi ojehúva
Ha amo hapópe
Opavavetépe
Ñanderupytýva
Ha ñandejukáva
Mbeguekatumi.
Yvy, ñande sy,
Hesay, hasê
Oñandu, ombyasy
Hesegua omanóvo
Oîgui yvypóra
Ipy'ahatâva
Ha nomomba'éiva
Tupâ rembiapo,
Péva ha'ehína
Kuimba'e ñaña
Tekove marâ
pyhare ha ára
-Imba'epotágui-
Oity ha ojukáva
Ka'aguy porâ.
Ta'ânga: Greenpeace - Amazonas
II
Ko mba'e vai
Opa rupi ojehu
Ha omomeĝua,
Ombohasyete
Ha omombyky
Ñande rekove.
Ka'aguy ha'e
Ñanemoingovéva
Upégui osê
Yvyra porâ
óga aporâ,
Hyepýgui osê
Yvytu potî
Ombopiro'ýva
Ha omohesâiva
Ñande retepy,
Upéicha avei
Yva he'êtéva
Ñaikotevêtéva
Jaikove haĝua,
Ha jepémo péicha
Jajuhu yvy ári
Tekove marâ
Oity ha ojukáva
Ñande ka'aguy.
Ko mba'e vai
Opa rupi ojehu
Ha omomeĝua,
Ombohasyete
Ha omombyky
Ñande rekove.
Ta'ânga: Táva Santa Rita Yvyraguy
III
Anivéna upéicha
Che rapichakuéra...
Jahechakuaána
Ka'aguy omanóvo
Ñande avei
Ñambogue jahávo
Ñande rekove
Ha ñamoaĝui,
Pya'e pya'eve,
Pytû guasuete,
Tekove paha.
Tupâ, Ñande Ru,
Ome'ê ñandéve
Y, yvy,
Yvytu, yvyra
Jaikopa haĝua
Oñondivepa
Ha jekupytýpe.
Anive jaity,
Térâ jahapy,
Ani jajahéi
Ani ñaikytî,
Ani jajuka
Ka'aguy porâ
Jaipuru uvei,
Tekokatuetépe,
Yvyramimi
Tekotevêmíva
Ha ñañangarekóke
Ka'aguymimíre
Jaikuaaporâgui
Ñanderiregua
Oikova'erâha
Tekoha potîme,
Vy'a ha tesâime.
Anivéna upéicha
Che rapichakuéra,
Jahechakuaána
Ka'aguy omanóvo
Ñande avei
Ñambogue jahávo
Ñande rekove
Ha ñamoaĝui,
Pya'e pya'eve,
Pytû guasuete,
Tekove paha.
Ta'ânga: Indi. Ava Guarani rekoha, Kanindejúpe
ooo000ooo
Leer AMA (LLUVIA), en (http://cafehistoria.ning.com/profiles/blogs/ama-lluvia)